كوتشFitness Way

الخصوصية والشروط

آخر تحديث 22 أكتوبر

التطبيق ده بتتابع بيه الكوتش المتدربين: الاستمارة، والبرنامج، والمتابعة اليومية، والدفع. الصفحة دي بتقول بنجمع إيه، وليه، ومين بيشوفه، وإزاي تطلب تمسحه.

بنجمع إيه

• بياناتك الأساسية: الاسم، ورقم الموبايل، وتاريخ الميلاد، والطول. وللأطفال: اسم ولي الأمر ورقمه.
• الاستمارة: هدفك، ونشاطك، وتمرينك، وأكلك وحساسيتك، ونومك.
• بيانات صحية: أسئلة الأمان قبل التمرين (PAR-Q)، والأمراض والأدوية والإصابات، والحمل والرضاعة لو موجودين.
• القياسات والصور: الـ InBody، والوزن والمقاسات، وصور التقدم لو رفعتها.
• المتابعة اليومية: الوجبات اللي أكلتها، والتمرين، والمية، والنوم، والمود، وأي ملاحظة بتكتبها.
• الدفع: الباقة، والمبلغ، وطريقة الدفع، وإثبات الدفع لو رفعته. مبنجمعش أرقام كروت.
• الدخول: البصمة (passkey) بتفضل على موبايلك، وإحنا بنحتفظ بس بمفتاح عام منها، واسم الجهاز، ووقت آخر دخول.

ليه

علشان الكوتش تجهّزلك برنامج أكل وتمرين مناسب ليك وتتابع تقدمك، وعلشان الاشتراك والدفع. مبنستخدمش بياناتك في إعلانات، ومبنبيعهاش.

مين بيشوفها

• الكوتش وفريقها بس هما اللي بيشوفوا بياناتك جوه التطبيق.
• ChatGPT أو Claude: لو الكوتش ربطت حسابها بيهم، تقدر تسألهم عن بياناتك (زي حساسيتك أو قياساتك) علشان تجهّز برنامجك أسرع. وده بيحصل بس لما هي تطلب.
• الاستضافة والباك أب: السيرفر في أوروبا، والنسخ الاحتياطية متشفرة على Cloudflare.
• فيديوهات يوتيوب أو Vimeo: لو التمرين عليه فيديو منهم، مبيتحمّلش ولا بيبعتلهم حاجة غير لما تدوس تشغيل.
• صور الوجبات: لو الكوتش رسمت صورة وجبة، بيتبعت لـ OpenAI وصف الأكل بس، من غير أي بيانات عنك.

إزاي بنحميها

• الاتصال كله متشفر (HTTPS).
• الصور والملفات (InBody، صور التقدم، إثبات الدفع) متخزنة متشفرة.
• الدخول بالبصمة، من غير باسورد يتسرق. ولينك الدعوة بيشتغل مرة واحدة.

حقوقك

• تشوف بياناتك وتصلّحها في أي وقت، من حسابك أو بإنك تكلم الكوتش.
• تطلب مسح بياناتك: كلّم الكوتش على الواتساب 01023200051 ، وبتتمسح في خلال 30 يوم. سجلات الدفع بس ممكن تفضل للحسابات.
• تسحب موافقتك على الصور في أي وقت، والصور بتتمسح.
• للأطفال: ولي الأمر هو اللي بيوافق، وهو اللي يقدر يطلب أي حاجة من دول.

الشروط

• مش استشارة طبية: البرنامج تمرين وتغذية عامة. لو عندك مرض أو حمل أو إصابة أو بتاخد أدوية، استشير دكتور قبل ما تبدأ، وقول لـالكوتش لو أي حاجة اتغيرت. وقّف التمرين لو حسيت بدوخة أو ألم في الصدر أو ضيق نفس.
• حسابك ليك: الدعوة شخصية، متبعتهاش لحد. لو غيرت موبايلك أو حد تاني عرف يدخل، كلّم الكوتش علشان تقفل الحساب وتبعتلك دعوة جديدة.
• الاشتراك والدفع: الأسعار ومدة الباقات بيحددها الكوتش. الدفع بالتحويل، واشتراكك بيتحدّث بعد ما تتأكد إن الفلوس وصلت. الاسترجاع حسب اتفاقك مع الكوتش.
• الفيديوهات والمحتوى: للاستخدام الشخصي بس، ومتتنشرش.
• التغييرات: لو الصفحة دي اتغيرت، التاريخ اللي فوق بيتغير.